Ես հիմա ներկայացնում եմ տարեսկզբից մինչև տարեվերջյան հաշվետվություն և պատմում մեր քոլեջում ապրած ամեն մի պահի մասին։ Մենք մեր <<Մխիթար Սեբաստացի>> կրթահամալիրի քոլեջում շատ-շատ գեղեցիկ և անմոռանալի օրեր ենք ունեցել։ Ամեն առավոտ մենք դասերից առաջ 20 րոպե մասնակցում ենք ընդհանուր պարապունքին մեր սիրելի ընկեր Մարինեի հետ, երգում ենք ու պարում, թարմանում ենք և անցնում մեր դասերին։ Քոլեջի ուսանողներով ճամփորդել ենք և ունեցել ենք շատ հետաքրքիր արկածներով հագեցած օրեր։ Դասերի շրջանակներում կատարել ենք անհատական նախագծեր և իմացել ավելին։ Ունենք նաև մասնագիտական ընտրության դասաժամեր։ Մենք ընկեր Թերեզի հետ անցնում ենք կավագործություն, նա մեզ շատ գիտելիքներ է տվել և սովորեցրել է շատ ու շատ իրեր պատրաստել։ Ընտրության մարզաձևը՝ ընտրել եմ վոլլեյբոլ, քանի որ շատ եմ սիրում խաղալ։ Հետաքրքրիր ֆիզկուլտուրայի դասեր ենք անցկացնում։ Մասնագիտական ընտրությունս՝ նախադպրոցական կրթությունն է, բայց սիրում եմ զբաղվել հագուստի դիզայնով և ուզում եմ փոխել մասնագիտությունս։
Մեր բոլոր առարկաներից կատարել ենք ֆլեշմոբներ։ Առարկաներն են՝ Հայոց լեզու, Գրականություն, Հայոց պատմություն, Հասարակագիտություն, Աշխարհագրություն, Կենսաբանություն, Ֆիզիկա, Էկոլոգիա, Մաթեմատիկա, Անգլերեն, Ռուսերեն։
Ես չեմ աշխատում, զբաղվում եմ ինքնակրթությամբ, պարապում եմ նկարչություն և գծագրություններ անում։
Այս տարին ես համարում եմ ձեռքբերումների տարի։ Քոլեջում ձեռք եմ բերել շատ ընկերներ, բայց, ցավոք, նրանցից մի քանիսի ավարտական տարին է այս տարի և ստիպված ենք հրաժեշտ տալ միմյանց, բայց ես վստահ եմ, որ շփումը կպահենք նաև քոլեջից դուրս։
Նաև ուզում եմ խոսել մեր քոլեջի ուսուցիչների մասին։ Մեր քոլեջի ուսուցիչները տարբերվում են իրենց ջանասիրությամբ, աշխատասիրությամբ և մեր հանդեպ մեծ ուշադրությամբ։ Մենք գնահատում ենք նրանց ուշադրությունը և այդ մեծ սերը։ Շնորհակալ ենք բոլորիդ, սիրում և գնահատում ենք ձեր աշխատանքը։ Ուզում եմ առանձին շնորհակալություն հայտնել մեր ընկեր Մարիամին։ Նա մեզ շատ-շատ հետևողական է, տեղեկացնում է մեր դասերի հետ կապված ամեն ինչ, մեր ամեն մի քայլին ուշադիր է, մեզ չի թողնում, որ ինչ-որ սխալ քայլ անենք։ Հա շատ է զայրանում մեզ վրա, բայց ինչ էլ, որ լինում է նա միշտ մեզ ընդառաջում է և մեր կողքին է։ Եվ վերջում ուզում եմ շատ մեծ շնորհակալություն հայտնել մեր տնօրենին՝ ընկեր Տաթևին, որ նույնպես ուշադիր է մեր հանդեպ և ունի այսպիսի լավ անձնակազմ։
Կյանքը քոլեջից դուրս և քոլեջում
Քոլեջից դուրս ես իմ ընկերների հետ ավելի խորը ծանոթացա մեր բազմօրյա ճամփորդությունների ժամանակ։ Ես մասնակցել եմ ՝ Սևան, Գութանասար, Հրեշտակների ձոր, Սահադաշտ, Գյումրի ճամփորդություններին, որոնք օգնել են ոչ միայն ամրապնդելու կապերը ընկերներիս հետ, այլև նպաստել են իմ հայրենի երկիրը լավ ճանաչելուն։ Ես շատ սիրեցի մեր չքնաղ Գյումրին, ճիշտ է՝ առաջին անգամ չէի Գյումրիում, բայց էլ ավելի սկսեցի սիրել Գյումրին։ Հետաքրքիր էր տեսնել Գութանասարը և բարձրանալ, ճիշտ է՝ դժվարությամբ, բայց մեծ հետաքրքրությամբ։ Իսկ Հրեշտակների ձորի մասին խոսքեր չունեմ, այդ ճամփորդության շրջանակներում նաև եղանք Խոր Վիրապում։
